Mediat greke kanë publikuar sot detaje të reja për shqiptarin, i cili së bashku me shokun e tij grek vrau dhe e hodhi në det studenten greke, Eleni Topaloud në natën e 27 nëntorit në Rodos.
Studentja greke u vra nga të rinjtë pasi refuzoi të kryente marrëdhënie seksuale me ta.
Fillimisht të rinjtë goditën vajzën greke me një shufër hekuri pas kokës dhe më pas trupin e pajetë e hodhën në det në tentativë për të fshehur gjurmët e krimit. Ndërkohë raporti mjekoligjor ka konstatuar se studentja greke ka vdekur si pasojë e mbytjes dhe jo e goditjeve pas koke siç u pretendua fillimisht nga mediat e shtetit fqinj.
Sipas medias greke “Ekathimerini”, gjatë një hetimi policor në ishull, mësohet se shqiptari në bashkëpunim me një rom përdhunoi edhe një vajzë tjetër 19-vjeçare, përcjell Balkanweb. Ky akt i rëndë raportohet se ka ndodhur pak ditë pas vrasjes së studentes.
Sipas një raporti të mediave lokale, thuhet se vajza e cila ra pre e përdhunimit të romit dhe shqiptarit ka qenë me aftësi të kufizuara. Pas arrestimit, 23-vjeçari rom ka pranuar autorësinë para policisë dhe hetuesve, ndërsa deklaroi se dhe shqiptari kishte gisht në këtë agresion seksual.