Gjykata Themelore në Prishtinë ka refuzuar kërkesën e palës mbrojtëse që katër aktivistëve të Vetëvendosjes, të cilët janë kandidatë për deputetë t`iu hiqet masa e arrestit shtëpiak gjatë fushatës zgjedhore.
Bëhet fjalë për Egzon Halitin, Adea Batushën, Atdhe Arifin si dhe Frashër Krasniqin, të cilët akuzohen për sulmin ndaj objektit të Kuvendit të Kosovës gjatë vitit të kaluar.
Lajmin e ka bërë të ditur Frashër Krasniqi me anë të një postimi në Facebook.
“Sot gjykata paska refuzuar kërkesën tonë që të lirohemi së paku gjatë fushatës elektorale për të zhvilluar lirshëm aktivitetin tonë si kandidatë për deputetë.
Por derisa gjykatat e kapura po na mbajnë nën arrest me montime, qytetarët po bëjnë fushatë për ne sepse besojnë në pafajësinë tonë. Vota e tyre do të jetë dëshmi për këtë.Populli dhe historia janë gjykuesit më të rëndësishëm”, ka shkruar Krasniqi.