Përfaqësues të Autoritetit Kosovar të Konkurrencës kanë thënë sot se nuk kanë gjetur ndonjë parregullsi në laboratorët privatë të licencuara nga Ministria e Shëndetësisë për testimet e virusit SARS CoV 2.
Në konferencën për media lidhur me monitorimin e çmimeve për testimet për virusin SARS-Cov-2, Muhamet Krasniqi nga AKK theksoi se nga 118 laboratorë të licencuar, bazuar në informatat që kanë nuk kanë arritur të identifikojnë ndonjë sjellje e cila ngre dyshim për fiksim të këtyre shërbimeve apo bashkërendim të aktiviteteve mes operatorëve që mund të bien ndesh me Ligjin e konkurrencës.
“Është një treg që po funksionon mirë, së paku deri tash, pra një treg i liberalizuar”, tha Krasniqi.
Në këtë konferencë u tha se AKK nuk ka pranuar asnjë ankesë nga qytetarët për ndonjë parregullsi për laboratorët privat që kryejnë testime për COVID-19. /Telegrafi/