Futbollistët shqiptarë nga mbarë bota kanë uruar për pranimin e Kosovës në UEFA. Njëri ndër ta ishte edhe Albian Ajeti, i cili luan në Augsburg.
Ajeti rrjedh nga një familje sportistësh dhe së bashku me dy vëllezërit e tij, janë lojtarë shumë të dalluar. Albiani u transferua nga Baseli në Augsburg të Gjermanisë, ku dëshiron të lë gjurmë. I pyetur se, nëse vjen ftesa nga Kosova në drejtim të tij, ai është përgjigjur: “Fillimisht urime për pranimin. Për momentin kam tri kombëtare që mund t’i zgjedh, por dëshira ime e tashme është që të bëhem i rëndësishëm për Augsburgun dhe më pas të mendoj për të zgjedhur kombëtare”, ka thënë Ajeti për albinfo.ch.
Ai është paraqitur për të gjitha grupmoshat e Zvicrës, derisa ka edhe nënshtetësi shqiptare. Vëllai i tij, Arlindi luan për Kombëtaren shqiptare dhe këtë mundësi mund ta ketë edhe Adonisi, duke u bashkuar tre vëllezër në një Kombëtare.
Një çështje që po diskutohet shumë në trojet shqiptare, por edhe në Zvicër edhe në Evropë është nëse Xherdan Shaqiri, Granit Xhaka, Valon Behrami e Adnan Januzaj do të luajnë për Kosovën, por këtë çështje nuk e komenton futbollisti i Augsburgut. “Nuk komentoj asgjë për lojtarët tjerë”, deklaroi shkurt Albian Ajeti.