Jude Bellingham ka qenë në formë të jashtëzakonshme që kur iu bashkua Real Madridit nga Borussia Dortmund. Anglezi ka qenë padyshim njëri nga lojtarët më të mirë në botë në këtë edicion të ri të garave dhe ai do të shpresojë ta mbajë këtë formë edhe pas pushimit me kombëtare.
Nuk janë vetëm fansat dhe ekspertët që janë impresionuar nga performancat e Bellingham deri më tani këtë sezon. Andreas Christensen, i cili do të përballet me të më vonë këtë muaj në El Clasico, tha për televizionin TV2SPORT se Bellingham ka qenë i shkëlqyeshëm.
“Është e bezdisshme kur ulesh dhe shikon rezultatet që ai po merr. Ai ka shënuar në ndeshjet e fundit, nuk e di në sa ndeshje tashmë. Ai ka pushtuar La Ligën. Real Madrid ka sjellë një lojtar vërtet të mirë”, ka thënë Christensen.
Forma spektakolare e Bellingham sigurisht që do t’i japë Christensen dhe Barcelonës edhe më shumë motivim për ta mposhtur atë më vonë këtë muaj kur të dy skuadrat takohen në stadiumin olimpik në Montjuic.
20-vjeçari ka shënuar tetë gola dhe ka bërë dy asistime deri më tash në La Liga, duke kryesuar listën si top-golashënuesi më i mirë në elitën e futbollit spanjoll.
Këtë formë të mirë ai e ka shfaqur edhe në Ligën e Kampionëve ku edhe aty ka shënuar dy gola dhe ka asistuar në një tjetër./Telegrafi/