Duke dhënë një përditësim mbi gjendjen fizike të Anthony Martial dhe planet e tij për sulmuesin, Erik ten Hag ka thënë se francezi është një futbollist brilant.
Manchester United thuhet se ende nuk ka pranuar asnjë ofertë për sulmuesin, ndërsa trajneri holandez i ka dhënë shpresë atij se mund të qëndrojë edhe për një sezon.
“Sot, ai ishte në stërvitjen e ekipit, kjo është vërtet shpresëdhënëse. Sigurisht, kur keni një lojtar në skuadrën tuaj, prisni që ai të jetë i disponueshëm dhe lojtarët duhet të marrin përgjegjësi. Nëse jo, më duhet të përballem me situatën dhe ne kemi treguar se mund të jemi të suksesshëm pa atë sulmues”, ka thënë Ten Hag.
“Por, është më e lehtë kur e ke atë sulmues në ekip, mendoj se çdo klub që fiton trofe të mëdhenj ka aftësi shënimi në ekipin e tij”.
“Ne kemi nevojë për një skuadër të mirë dhe Anthony Martial është një futbollist i shkëlqyer, kështu që ai do të na ndihmojë, ai shënon gola dhe në fusha të tjera si presing dhe kombinime, ai është një lojtar i madh, ne shpresojmë që ai të jetë në formë dhe të qëndrojë në formë”, ka shtuar më tej strategun holandez.
Duket se Ten Hag synon të përdorë Martial kur të fitojë formë dhe ta ketë në planet e tij për sezonin e ardhshëm. Kjo mund të jetë për shkak të mungesës së interesimit nga klubet e tjera për të nënshkruar me të, me disa thashetheme që e lidhin atë vetëm me Arabinë Saudite.
Martial nuk mundi t’i përfundonte të gjitha 90 minutat në një ndeshje të vetme sezonin e kaluar dhe ka luftuar me gatishmërinë e tij gjatë gjithë vitit të kaluar. /Telegrafi/