Kryetari i BDI-së Ali Ahmeti, në një takim sot me gazetarët, tha se nuk është koha e duhur për ndryshime në Kodin Zgjedhor. Ai deklaroi se do të nevojitet takim i ri liderësh tek presidenti, për ndryshimin eventual të datës së zgjedhjeve.
“Tek presidenti të gjithë unanimisht u pajtuam për dy çështje: e para për anëtarësim në BE, e cila është pa alternativë nga të gjitha partitë, e dyta në çka u dakorduam më 12 prill të vitit 2020 të organizojmë zgjedhje të parakohshme parlamentare”.
“Nëse bëhet pishman Zaevi, nuk mendoj se duhet të mbajmë qëndrime të njëanshme. Do të duhet të thërrasim mbledhje të re nga presidenti i shtetit që ta kontestojmë datën e harmonizuar. Dhe të gjithë do të duhet atje t’i prezantojnë qëndrimet e tyre nëse pajtohen apo jo. Unë do të pajtohesha që presidenti i shtetit të thërrasë mbledhje. Dhe t’i shohim shkaqet e vërteta, nëse do të pajtoheshin të gjithë të anulohen zgjedhjet”, tha Ahmeti.
Sipas tij, Kodi Zgjedhor është shumë çështje e ndjeshme, për shkak se sipas tij, edhe ky ndryshim duhet të bëhet me konsensus dhe me pajtueshmëri të të gjitha partive politike.
Në pyetjen, kush do të jetë i pranueshëm për kryeministër teknik, Oliver Spasovski apo Milla Carovska, Ahmeti tha se nuk ka marrë propozime./Telegrafi/