Aguero njofton se do të jetë trajner në Kupën e Botës “Katar 2022”

Sergio Aguero ka njoftuar se do të shkojë në Kupën e Botës “Katar 2022”, ndërsa përgatitet të bashkohet me stafin stërvitor të Argjentinës.

Në tetor, gjatë një përplasjeje në La Liga kundër Alavesit, ish-sulmuesi i Barcelonës, Aguero kishte vështirësi për të marrë frymë gjatë lojës dhe u dërgua në një ambulancë.

Kjo fatkeqësisht doli të ishte ndeshja e tij e fundit në futbollin profesionist.

Lexo po ashtu Sulmuesi i Barcelonës, Sergio Aguero është detyruar të largohet nga fusha pas problemeve me frymëmarrje

Dy muaj më vonë, pasi u diagnostikua me aritmi në zemër, 33-vjeçari njoftoi në një konferencë për mediat, ku konfirmoi tërheqjen nga loja.

“Shëndeti im është i pari. Stafi mjekësor më ka thënë se është më mirë të ndaloj së luajturi dhe kështu tani po largohem nga Barcelona dhe do të tërhiqem nga futbolli profesionist”, tha mes lotësh Aguero.

Tani, pas disa muajsh larg futbollit, lojtari i huaj me më shumë gola në histori të Ligës Premier po planifikon të luajë një rol trajneri për kombëtaren e Argjentinës.

Lexo po ashtu Zyrtare: Aguero me lot në sy konfirmon pensionimin nga futbolli

Në fakt, Aguero ka zbuluar së fundmi se ai ka folur tashmë me trajnerin Lionel Scaloni dhe presidentin Claudio Tapia për të bërë lëvizjen përpara Kupës së Botës që zhvillohet në dimër në Katar.

“Po shkoj në Kupën e Botës në Katar. Ne do të kemi një takim këtë javë. Unë dua te jem atje”, ka thënë fillimisht Aguero për Radio 10.

“Ideja është që unë të inkorporohem në stafin e trajnerëve. Kam folur me menaxherin Lionel Scaloni dhe presidentin Claudio Tapia”, përfundoi ish-sulmuesi. /Telegrafi/