Asociacioni i Gazetarëve të Kosovës, ka reaguar ashpër kundër hapjes së televizionit nga partia politike Lëvizja Vetëvendosje.
Përmes një komunikate për medie thuhet se hapja e një mediumi televiziv nga një parti politike është i dëmshëm për lirinë e medieve.
Sipas AGK-së një formë e tillë e funksionimit të televizionit nuk është gazetari.
“Asociacioni i Gazetarëve të Kosovës (AGK), e pranon me shqetësim hapjen e televizionit të ri online, TVV, të drejtuar nga partia politike Lëvizja Vetëvendosje. Themelimi i një mediumi televiziv nga një parti politike është i dëmshëm për lirinë e medieve. Një formë e tillë e funksionimit të televizionit nuk është gazetari. Për hapjen e TVV-së nga Lëvizja Vetëvendosje, ka reaguar edhe Federata Evropiane e Gazetarisë përmes një ‘tweet-i’, të publikuar në rrjetin social Twitter. “Televizioni i ri online TVV në Kosovë, është i krijuar drejtpërdrejtë nga një parti politike. Kjo nuk është gazetari. Kjo është propagandë në shërbim të politikanëve”, thuhet në reagimin e federatës. AGK i bashkohet reagimit të EFJ-së, duke theksuar se hapja e një televizioni të tillë është i dëmshëm dhe i papranueshëm për lirinë e medieve dhe për një shtet demokratik”, thuhet në reagimin e AGK-së. /Telegrafi/
