Agjenti i Jorginhos, Joao Santos ka thënë se Chelsea mund të shesë klientin e tij në verë, nëse pranojnë një ofertë të mirë, derisa dy top klube evropiane janë të interesuara.
Mesfushori braziliano-italian ka edhe tri vite kontratë me The Blues, por spekulimet e fundit e lidhin me një ribashkim me Maurizio Sarrin te Juventusi.
“Nëse më pyesni mua, Sarri e pëlqen Jorginhon, dhe mund të them se mund të ndodhë një ribashkim shkaku i historisë së tyre”, ka thënë Santos.
“Nuk mund të them asgjë për afatin kalimtar veror, pasi ende nuk jam kontaktuar seriozisht nga askush. Jorginho ka ende kontratë me Chelsean, por nëse një ofertë e madhe arrin, Chelsea mund të shesë atë”.
“Në këtë rast, dy klube evropiane janë të interesuar për të dhe mund të ndodhë se shpejti të kemi ofertën në tavolinë”, ka shtuar ai më tej.
Chelsea e transferoi mesfushorin nga Napoli në verën e vitit 2018, gjersa ka shanse që ai të rikthehet në Serie A, mirëpo tani te Zonja e Vjetër. /Telegrafi/