Agjencia për ushqim dhe veterinari (AUV) apelon te qytetarët e rajoneve të prekura nga përmbytjet që të përcjellin informacionet për furnizim me ujë dhe për cilësinë e ujit për pije, përmes televizioneve lokale, kombëtare, radiove dhe portaleve, transmeton Telegrafi Maqedoni.
AUV-ja porosit që të përdoret ujë i paketuar, për pije, gatim dhe për higjienë personale, ose të përdoret uji i tankerëve që e sjellin ndërmarrjet publike të furnizimit me ujë.
AUV-ja porosit që nëse keni ujë rezervë, fillimisht duhet ta zieni për 15 minuta, ose të bëhet klorizimi i ujit nga persona të aftësuar.
AUV-ja porosit që të mos përdoret uji i turbullt, deri sa të bëhet sanimi i gjendjes dhe të sigurohen vërtetimet laboratorike për cilësinë e ujit.
AUV-ja porosit dezinfektimin e ujit, nëse furnizoheni nga ujësjellës individualë.
AUV-ja porosit që të mbahi higjienë të rregullt të duarve, duke i pastruar me detergjentë, ose prodhime dezinfektimi, posaçërisht pas kontaktit me ujë të ndotur nga vërshimet.
AUV-ja porosit që të mbrohet ushqimi i gatshëm që të mos vijë në kontakt me ujin e ndotur, ndërkaq ushqimi që është prekur nga uji i ndotur duhet që të hudhet.
AUV-ja porosit që të dezinfektohet hapësira e prekur nga uji i ndotur dhe të pastrohen enët për gatim./Telegrafi/