Ministri i Arsimit dhe Shkencës Arbër Ademi, sot deklaroi se me qasje serioze janë duke u shqyrtuar të gjitha opsionet për fëmijët e pavaksinuar, të cilët duhet ta fillojnë arsimin fillor në vitin e ardhshëm.
Ai tha se është realizuar takim me ministrat e Shëndetësisë dhe Drejtësisë, Venko Filipçe dhe Renata Deskoska, ndërsa shtoi se për këtë çështje do të diskutohet edhe në seancën qeveritare, përcjell Telegrafi Maqedoni.
“Një prej opsioneve që do të shqyrtohet është që nxënësit të regjistrohen, ndërsa të vaksinohen në shtator, gjegjësisht në fillim të shtatorit të ketë vaksinim në terren për të gjithë nxënësit e pavaksinuar”, tha Ademi.
Ai shtoi se në mënyrë plotësuese do të zbatohen konsultime me ekspertë të fushave, me qëllim që të gjendet zgjidhje e shpejtë për shkak të epidemisë së fruthit.
Ndryshe, për shkak të përhapjes së fruthit, Ministria e Shëndetësisë vendosi ndalesë për regjistrimin e fëmijëve të pavaksinuar në arsimin fillor./Telegrafi/