Ministria e Kulturës informon se dje është mbajtur takim mes kryeministrit Zoran Zaev dhe ministrit Asaf Ademi, në të cilin është diskutuar për programin vjetor për financimin e projekteve kulturore, si dhe aplikimet që u refuzuan.
“Në pajtim me qëndrimet dhe drejtimet e shprehura publikisht deri më tani nga kryeministri Zaev dhe nga ministri Ademi pas reagimeve dhe pakënaqësisë së shprehur nga një pjesë e opinionit, në takim ishte harmonizuar qëndrimi se komisionet e veprimtarive do t’i rishqyrtojnë fletëparaqitjet e refuzuara, dhe në pajtim me Ligjin për procedurë të përgjithshme administrative subjekteve që kanë dorëzuar fletëparaqitje në konkurset vjetore t’u jepet mundësia në afatin përkatës të dorëzojnë shpjegime plotësuese dhe dokumentacion për fletëparaqitjet të cilat kanë pasur mangësi formale”, thonë nga Ministria e Kulturës, njofton Telegrafi Maqedoni.
Ata shtojnë se shpjegim plotësues të fletëparaqitjes së dorëzuar mund të kërkohet vetëm për projektet për të cilat komisioni profesional ka vlerësuar se janë në funksion të zhvillimit, afirmimit dhe promovimit të kulturës në Republikën e Maqedonisë së Veriut dhe të cilat kanë parakushte të zgjidhen projekte me interes nacional në kulturë për vitin 2019.
“Kryeministri Zaev dhe ministri i Kulturës Ademi e miratojnë këtë vendim si rezultat i qëndrimeve të dëgjuara të punëtorëve kulturorë dhe paralajmërojnë se dialogu me sferën kulturore do të vazhdojë me qëllim të avancimit të mirëkuptimit reciprok dhe mbështetjes së zhvillimit të kulturës në shtet. Me këtë rast, ministri i Kulturës Ademi, do t’i ftoj të gjithë aplikuesit në mbledhjet e Ministrisë të cilët kishin vërejtje me qëllim që të përkufizohen hapat me të cilat në të ardhmen do t’u shmangen mosmarrëveshjeve ose mangësive gjatë konkurseve publike”, shtojnë nga Ministria e Kulturës.
Ata më tej shtojnë se ministri Ademi mbetet i hapur për sugjerimet dhe nevojat e institucioneve nacionale me udhëheqësit e të cilave është në kontakt të vazhdueshëm, dhe për të cilat, sipas Ligjit për kulturë, janë të mundshme ndryshimet në financim gjatë gjithë vitit./Telegrafi/