Këngëtarja e mirënjohur shqiptare, Adelina Ismaili, ka bërë një reagim të fortë në rrjetet sociale pas takimit të kryeministrit Albin Kurti me aktorin e mirënjohur Enver Petrovci.
Në një postim në InstaStory, Adelina ka rishpërndarë postimin e kryeministrit Kurti, duke shprehur mbështetjen e saj për këtë gjest.
Në mbishkrimin e postimit, Adelina ka shkruar: “E lumtur që pas fushatës denigruese ndaj profës, pas paraqitjes së tij në emisionin tim, kryeministri dëshmoi që nuk qenka i ndikuar nga rrethanat”.
Ky reagim i këngëtares vjen pas një periudhe të vështirë për aktorin Petrovci, i cili kishte marrë reagime të shumta muaj më parë pas disa deklaratave që bëri në emisionin e Adelinës, “Show i Së Premtes”, në lidhje me UÇK-në.
Adelina Ismaili, e njohur për qasjen e saj të drejtpërdrejtë dhe të sinqertë, ka mbështetur publikisht Enver Petrovci, duke lënë të kuptohet se është e lumtur që kryeministri ka treguar mbështetje për aktorin, pavarësisht presioneve dhe rrethanave të krijuara nga deklaratat e tij në të kaluarën.
Deklaratat e Enver Petrovci në emisionin e Adelinës ngjallën një valë reagimesh dhe polemikash, duke e bërë atë një nga temat më të diskutuara të kohës.
Megjithatë, takimi i fundit midis kryeministrit Kurti dhe aktorit Petrovci tregon se mbështetja dhe respekti për kontributin e tij në art dhe kulturë mbeten të palëkundura. /Telegrafi/