Në seancën e jashtëzakonshme të Kuvendit të Kosovës, për situatën aktuale të shqiptarëve në Preshevë, Bujanoc dhe Medvegjë, ka folur edhe deputeti i LDK-së, Arban Arbashi.
Abrashi, tha se është fatkeqësi që sot në vitin 2019, në këtë pjesë të Ballkanit, dhe të Serbisë, të një shteti që aspiron të jetë pjesë e BE-së, shqiptarët e
Luginës jetojnë në një gjendje të pa perspektivës totale, diskriminimit etnik, kulturor dhe social.
“Sot Qeveria e Kosovës dhe institucionet përkatëse, duhet të mobilizohen për një plan afatshkurtër dhe afatgjate. Dhe këtë nisme, ne duhet ta fillojmë sot këtu, në Kuvend, duke kërkuar nga ekzekutivi t’i përmbushë obligimet, sikurse dhe t’i tejkalojë ato, duke marrë nisma të reja sistematike, duke mbështetur një plan konkret që tejkalon mandatet qeveritare dhe politikat ditore. Ne, sot duhet të krijojmë mekanizma e projekte konkrete, sikurse plane afatgjate me njerëz përgjegjës për realizimin e tyre në funksion të përmirësimit të jetës së shqiptarëve në Luginë të Preshevës, si dhe në ruajtje të identitetit të tyre kombëtar”, tha Abrashi.
Ai shtoi se LDK do ta përkrahë çfarëdo vendimi që do të nxjerr Kuvendi për të mirën e shqiptarëve në atë pjesë. /Telegrafi/