Kryetari i LDK-së, Lumir Abdixhiku e ka cilësuar pozicionin e kryeministrit Albin Kurti në procesin e dialogut, si “fat i trishtueshëm politik”.
“Për këto qëndrime, për pozicionin ndryshues të Albin Kurtit unë ndjej keqardhje, çfarë fati i trishtueshëm politik”, tha Abdixhiku.
Ai shtoi se raportimet në Kuvend të kryeministri kanë humbur peshën e substancës tërsishtë sepse ato ose bëhen pasi të ketë përfunduar gjithçka e deputetët dhe partitë mbesin në terr informativ, ose edhe më rëndë humbasin peshën e fjalëve pasi që çdo gjë që flitet këtu zhbëhet pak ditë më pas në një takim të radhës në Bruksel, në një paraqitje televizive.
Tutje, kryetari i LDK-së theksoi se të 6 kushtet e Kurtit për formimin e Asociacioni u zhbënë.
“Të 6 kushtet e kryeministrit rreth formimit të Asociacionit të bëra publike në seancën e 2 shkurtit 2023, u zhbënë fillimisht me marrëveshjen e 27 shkurtit e më pas përfundimisht në aneks-marrëveshjen e Ohrit. Asociacioni është pjesë e marrëveshjes finale dhe zbatohet pas njohjes reciproke ishte njëri ndër kushtet e Kurtit në këtë Kuvend, dhe nuk kanë kaluar as 2 muaj dhe aneks-marrëveshja e pranuar në formë deklarative në Ohër parasheh qartë obligimin e palëve për të nisur menjëherë diskutimet e themelimit të aranzhimeve speciale për vetmenaxhimin e komunitetit serb në Kosovë sipas marrëveshjeve paraprake në një marrëveshje pa njohje në të”, tha Abdixhiku.
Abdixhiku shtoi se ka breng qëndrimin politik të Republikës së Kosovës, e jo si paraqitet në pasqyrë Kurti.
“Unë breng nuk e kam se në pasqyrë a i del vetja luan apo kameleon, unë breng kam qëndrimin politik të Republikës së Kosovës dhe mungesën e plotë të kredibilitetit”, tha ai. /Telegrafi/