Policia e Kosovës vazhdimisht kujdeset që siguria në trafikun rrugor për të gjithë pjesëmarrësit në trafik të jetë sa më e lartë, por pavarësisht angazhimit të tyre shpeshherë përballet me drejtues të mjeteve motorike të cilët kryejnë kundërvajtje, duke paraqitur rrezik për pjesëmarrësit e tjerë në trafik.
Kapiten Albin Sahatqija, Komandant i Njësisë së Trafikut Rajonal të Policisë në Gjakovë, në një intervistë për Telegrafin foli rreth numrit të gjobave të cilat janë shpërndarë nga fillimi i vitit 2024, për kundërvajtësit në trafikun rrugor.
“Drejtoria Rajonale e Policisë në Gjakovë, në aspektin e sigurisë rrugore, përveç masave preventive, fushatave vetëdijësuese, dhe të gjitha aktiviteteve tjera për sigurinë rrugore, ka marrë edhe masa ndëshkuese ndaj drejtuesve të mjeteve motorike. Nga muaji janar i viti 2024 e deri më tani janë shqiptuar rreth 52 mijë gjoba nga Drejtoria Rajonale e Policisë në Gjakovë, ku përfshihen stacionet policore në Gjakovë, Malishevë dhe Rahovec”, tha fillimisht Sahatqija.
Bazuar në aksidentet të cilat mund të përfundojnë me fatalitet nga pakujdesia e drejtuesve të mjeteve motorike në trafik, kapiten Sahatqija, pati edhe një apel për të gjithë shoferët dhe ata që marrin pjesë në trafikun rrugor.
“Apeli i Njësisë së Trafikut Rajonal të Policisë në Rajonin e Gjakovës është që të gjithë pjesëmarrësit në trafik të vetëdijesohen, ta ngrisin vetëdijen, të kenë kulturë më të lartë në aspektin e sigurisë rrugore. Kërkojmë që të gjithë ta japin kontributin në këtë aspekt, duke u nisur nga Policia dhe nga të gjitha institucionet tjera, sepse nëse ne të gjithë angazhohemi, atëherë nuk do të kemi më aksidente dhe viktima në rrugë”, shtoi ndër të tjera Sahatqija.
Më poshtë mund ta ndiqni intervistën e plotë me kapiten Albin Sahatqija, Komandant i Njësisë së Trafikut Rajonal të Policisë në Gjakovë. /Telegrafi/
