Hekurudhat e Kosovës do të përmirësohen dukshëm, e sidomos njëra ndër linjat kryesore të hekurudhës në Kosovë, ajo nga Han i Elezit në Leshak
Kjo, pasi që të martën është nënshkruar edhe pjesa e dytë e kredisë nga vlera e përgjithshme, rreth 200 milionë euro, ka deklaruar në Ora e Fundit në Klan Kosova, drejtor i Infrastrukturës së Hekurudhave të Kosovës, Agron Thaçi.
“Deri në këtë ditë i kemi të siguruar rreth 120 milionë euro dhe Komisioni Europian ka premtuar që edhe një pjesë tjetër do ta sigurojë. Kjo nënkupton riparimin e komplet linjës hekurudhore”. Do të bëhet riparimi dhe ndërrimi i të gjithë komponentëve – superstrukturës dhe nënstrukturës. Pasi të përfundohet i gjithë projekti do të bëhet edhe elektrifikimi i të gjithë segmentit”, ka thënë Thaçi.
Sipas drejtorit të InfraKosit, përmirësimi i segmenteve të hekurudhave do të ndikojë edhe në rritjen e shpejtësisë së trenave në Kosovë.
“Kontratën me një kompani konsulente nga Gjermania e kemi nënshkruar tash e disa muaj, për segmentin e parë mbi 60 kilometra. Përmirësimi i shtegut mundëson që të ngritet shpejtësia e lëvizjes, edhe me trenat aktual, pas përmirësimit të mjeteve lëvizëse. E rëndësishme është që hekurudha mundëson lëvizjen me shpejtësi 120 km/h, në pjesën më të madhe të segmentit – do të përfitohet në cilësi dhe shpejtësi”, pohoi Thaçi.
Ai, po ashtu foli edhe për masat e sigurisë që pritet të ndërmerren.
“Momentalisht pikat kritike i kemi vendkalimet në nivel, të cilat është paraparë që të sigurohen me barriera mbrojtëse. Siguria do të ngritet në nivelin më të lartë. Por duhet edhe të rritet vetëdija e qytetarëve”. Kemi menduar që ta bëjmë një rrethojë mbrojtëse përgjatë gjithë linjës hekurudhore”, tha ai. /Telegrafi/