Telegrafi

​Merkel: E gatshme për të negociuar me Socialdemokratët

Angela Merkel konfirmoi sot gatishmërinë e kampit të saj konservator, për të diskutuar seriozisht me socialdemokratët për të formuar qeverinë, duke argumentuar pritshmëritë e mëdha në Evropë kundrejt Gjermanisë.

“Jemi të gatshëm për të nisur bisedimet me SPD-në”, deklaroi Merkel pas hapjes së dritës jeshile nga partia e saj CDU për të propozuar nisjen e bisedimeve me SPD, me të cilën ajo ka qeverisur tashmë dy mandate (2005-2009, më pas 2013-2017).

Kjo aleancë është ende e vetmja mundësi për të formuar një shumicë në Dhomën e Deputetëve dalë nga zgjedhjet parlamentare të shtatorit, pas dështimit të një përpjekje për koalicion mes konservatorëve, liberalëve dhe ambjentalistëve.

Merkel premtoi negociata serioze dhe gjithëpërfshirëse, që duhet të synojnë suksesin.

“Tashmë ka një propozim për bisedime në tryezë dhe ne po e marrim shumë seriozisht”, shtoi kancelarja.

Konteksti ndërkombëtar dhe evropian duhet në këndvështrimin e tyre të nxisë partitë gjermane për të vepruar shpejt.

“Ka pritshmëri të mëdha në Evropë për çështje urgjente”, vlerësoi ajo.