FC Prishtina ka vazhduar me përforcime gjatë afatit kalimtar veror, ku tani ka angazhuar mbrojtësin Ramiz Bytyqi.
Mbrojtësi anësorë i bashkohet Prishtinës nga Ballkani ku ka nënshkruar kontratë afatgjate deri në verën e vitit 2025.
Bytyqi vjen nga skuadra e Ballkanit, ekip me të cilin është zhvilluar si lojtar, teksa për 13 vjet që nga grup-moshat e reja ka qenë pjesë e ekipit “portokalli”.
Mbrojtësi i djathtë është njohje e vjetër e trajnerit të ri të Prishtinës, Ismet Munishi, i cili e afirmoi Bytyqin në futbollin kosovar te skuadra e parë e Ballkanit.
23-vjeçari me Ballkanin edicionin e kaluar e fitoi titullin kampion.
Ai në të kaluarën ka qenë pjesë e reprezentacionit të Kosovës U-19 dhe U-21.
Ramizi pas prezantimit te Prishtina e ka dhënë një̈ prononcim për faqen zyrtare të klubit ku foli për objektivat që ka me skuadrën e tij të re.
“Të gjithë e dinë se Prishtina është klub i madh dhe pas bisedës me trajnerin Ismet Munishi vendosa t’i bashkohem ekipit. Jam shumë i lumtur me këtë fakt”.
“Synimet personale janë që të kem paraqitje sa më të mira me ekipin dhe t’i arrijmë objektivat që i ka klubi”, tha Bytyqi. /Telegrafi/