Klubi futbollistik i Llapit ka shkarkuar trajnerin që muaj më parë e solli në këtë postë.
Xhengis Rexhepit duket se i ka kushtuar me punë barazimi gjatë fundjavës me Ballkanin pasi tashmë më nuk është pjesë e skuadrës llapjane.
Klubi podujevas ka rikthyer në krye të stafit teknik trajnerin që vitin e kaluar udhëhoqi klubin, Tahir Batatinën.
“Klubi futbollistik “Llapi” njofton për përfundimin e bashkëpunimit me trajnerin Xhengis Rexhepi. Si pasojë e mungesës së pikëve të parapara në xhirot e luajtura, drejtuesit e klubit dhe Xhengis Rexhepi kanë ndërprerë bashkëpunimin me marrëveshje të dyanshme”, thuhet fillimisht në njoftimin e klubit.
“KF Llapi e falënderon Rexhepin për punën profesionale të bërë me klubin gjatë kësaj periudhe dhe i dëshiron suksese në karrierë”, shkruan më tutje.
“Njëherësh klubi njofton se nga dita e sotme, kryetrajner i Llapit do jetë Tahir Batatina i cili sot do filloj stërvitjet me skuadrën”, përfundon njoftimi i bardhekaltërve përmes rrjeteve sociale.
Ndryshe, Llapi zë pozitën e dytë të renditjes tabelore të IPKO Superligës së Kosovës në futboll me 47 pikë, përkatësisht ngec tetë pikë pas liderit, Feronikelit. /Telegrafi/
