KB Peja edhe zyrtarisht është rikthyer në elitën e futbollit kosovar.
Lajmi është konfirmuar edhe nga Federata e Basketbollit të Kosovës që ka njoftuar se bordi i saj ka miratuar kërkesën e klubit pejan për rikthim në basketbollin kosovar, madje menjëherë në Superligë.
FBK gjithashtu njofton se miratimi i kësaj kërkese është i kushtëzuar me heqjen e të gjitha ndalesave të regjistrimit të lojtarëve të rinj dhe paraqitjen e ekipit konkurrues për nivel të Superligës së Kosovës në basketboll.
“Bordi i Federatës së Basketbollit të Kosovës (FBK) në bazë të kompetencave të veta statutore sot ka marrë vendim për miratimin e kërkesës së KB Peja për inkuadrim në garën elitare të Superligës së Kosovës në basketboll në edicionin 2019-2020, si ekipi i nëntë garues”.
“Miratimi i kërkesës së KB Peja është i kushtëzuar me heqjen e të gjitha ndalesave të regjistrimit të lojtarëve të rinj dhe paraqitjen e ekipit konkurrues për nivel të Superligës së Kosovës në basketboll deri në afatin e përcaktuar të afatit kalimtar”, thuhet në vendimin e FBK’së.
Peja është një herë kampion i Kosovës, ndërsa ishte përjashtuar nga Superligë për borxhe. /Telegrafi/