Kandidati i PDK-së për Kryeministër, Bedri Hamza, ka prezantuar edhe masat që do t’i marrë në kuadër të zotimit të dytë të tij.
Ai ka bërë të ditur se në muajt e parë të qeverisjes, pagat në sektorin publik do të rriten për 50%.
Kjo rritje sipas tij garanton paga të dinjitetshme për të gjithë shërbyesit civilë dhe është shpërblim i duhur për shërbimin e tyre ndaj shtetit dhe qytetarëve.
Në zotimin e dytë, Hamza ka premtuar rritje edhe të pensioneve.
“50% rritje të pagave në sektorin publik. 70% rritje të pensionit bazik. Rriten pensionet kontributdhënëse dhe përshkallëzohen sipas viteve të përvojës së punës. 50% rritje të përfitimeve për familjet e dëshmorëve, invalidët e luftës dhe veteranët”, ka shkruar Hamza.
Hamza ka njoftuar se s’do të ketë tatime për pagat deri në 400 euro.
“Zero tatim për pagat deri në 400 euro. Kostoja e jetesës është bërë e papërballueshme dhe Kosovës i duhet një qasje e re për ta përmirësuar mirëqenien e qytetarëve.
#MaMirë #PDK131”, ka shkruar Hamza. /Telegrafi/
