Në konferencën për shtyp para ndeshjes së Ligës së Kampionëve kundër Borussia Monchengladbachut, trajneri i Real Madridit, Zinedine Zidane, ka folur edhe për reagimin e Iscos.
Mesfushori spanjoll është kapur nga kamerat gjatë një bashkëbisedimi me Marcelo, Luka Modric e Lucas Vasquez, duke e kritikuar francezin për trajtimin që i bën atij.
“Kur ai (Zidane) më aktivizon në formacionin e parë, mezi pret të më nxjerrë dhe e bën këtë pas një pjesëloje ose në minutën e 50-të. Ndërsa kur jam në bankën rezervë më inkuadron në fushë në minutën e 80-të”, citohet të ketë thënë 28-vjeçari, i cili qëndroi në bankën rezervë edhe në ‘el Clasico’ ndaj Barcelonës duke mos u aktivizuar.
Gazetarët e kanë pyetur legjendën lidhur me reagimet e Iscos, ndërsa ai është përgjigjur me diplomaci.
“Është ambicie. Ai dëshiron të luajë. Kjo është gjë pozitive. Lojtarët gjithmonë duan të luajnë. Ata duhet të jenë të gatshëm dhe të përgatitur për të luajtur kur t’ju vijë radha. Gjithmonë ka qenë kështu në këtë skuadër”, citon AS fjalët e Zidane. /Telegrafi/