Zëvendëspresidenti amerikan Mike Pence tha të shtunën se ai dhe gruaja e tij Karen do të testohen për coronavirusin pasi një anëtar i stafit në zyrën e tij doli pozitiv në testet për virusin këtë javë.
“Duke pasur parasysh pozicionin unik që kam si zv/president dhe si drejtues i grupit të punës coronavirus të Shtëpisë së Bardhë, si unë dhe gruaja ime do të testohemi për coronavirus”, tha Pence gjatë një konference për shtyp në Shtëpinë e Bardhë.
Ndryshe, siç shkruan CNN, përcjell Telegrafi, zyra e tij njoftoi të premten se një prej anëtarëve të zyrës së tij doli pozitiv për coronavirusin – rasti më i afërt i konfirmuar për Pence që njihet publikisht.
Pence u tha gazetarëve të shtunën se personi në fjalë i cili doli pozitiv në test për coronavirusin “po bën mirë”, kishte simptoma “të buta”, dhe nuk ka qenë në Shtëpinë e Bardhë që nga e hëna.
Ai përsëriti që presidenti Donald Trump dhe as ai vetë nuk kishin kontakte të drejtpërdrejta me anëtarin e stafit, dhe tha se autoritetet shëndetësore kanë gjurmuar kontaktet e tij.
Ndërkohë Trump tashmë ka dalë negativ në testin për coronavirus, tha Shtëpia e Bardhë javën e kaluar.
Pence dhe Dr. Anthony Fauci, drejtori i Institutit Kombëtar të Alergjisë dhe Sëmundjeve Infektive, theksoi për amerikanët se ata nuk duhet të testohen nëse nuk shfaqin simptoma për të ruajtur resurset. /Telegrafi/