Dom Nikollë Kaçorri u lind në fshatin Krejë të Lurës, në vitin 1862. Ai ishte zëvendëskryeministri i parë i Shqipërisë, në Qeverinë e Ismail Qemalit.
Pos veprimtarisë si prift katolik, ishte patriot që kishte marrë pjesë në Kongresin e Manastirit e atë të Elbasanit, ishte anëtar i shoqërive të rëndësishme të kohës, “Vllaznia” e “Bashkimi”, si dhe organizator i kryengritjes anti-otomane për pavarësinë e shqiptarëve.
Kaçorri ishte bashkëpunëtor i Abdi bej Toptanit dhe Mustafa Merlikës (Krujës), të cilët njëjtë si ai ishin nënshkrues të Dokumentit të Pavarësisë së Shqipërisë, shkruan Telegrafi.
Me rastin e shpalljes së pavarësisë, më 28 nëntor 1912, ai thotë: “Në qoftë për nesër, vdesim sot, o flamur o dekë”!
Më 29 maj 1917 vdes në Vjenë, ku kishte shkuar për t’u shëruar nga mushkëritë. Me vdekjen e Kaçorrit harrohet edhe vepra e tij, sidomos gjatë kohës së komunizmin. Por, ai edhe sot nuk e ka respektin e merituar.
Eshtrat e këtij patrioti u riatdhesuan më 2011. Por, shteti shqiptar nuk organizoi ceremoninë e rivarrimet. Ndërsa, edhe sot, më 2017 Shqipëria nuk ia jep nderet që meriton në prej arkitektëve të pavarësisë së shqiptarëve.
Kjo ka bërë që ndaj kësaj të reagojnë në profilet e tyre në Facebook, Pjetër Logoreci (nipi i Mati Logorecit që hapi shkollën e parë shqipe në Prizren) dhe studiuesi Bajram Mjeku.
“Zëvendëskryeministri i parë dhe turpi i shtetit shqiptar
Sot gjashtë vjet, falë përkushtimit të Pjetër Logorecit, u riatdhesuan eshtrat e Imzot Nikollë Kaçorrit, zëvendëskryeministrit të parë në Qeverinë e Ismail Bej Vlorës dhe arkitektit të shtetit shqiptar.
Imzot Nikollë Kaçorri u varros në maj të vitit 1917, në varrezat qendrore në kryeqytetin e Perandorisë Austro-Hungareze në Vjenë.
Kur eshtrat e Imzot Nikollë Kaçorrit pas 94 vjetësh mbërritën në atdhe, shteti shqiptar as organizoi pritjen, as ceremoninë e rivarrimit. Më keq se kjo, në riatdhesimin e eshtrave të Imzot Kaçorrit, nuk morën pjesë as deputetët e Durrësit, derisa shteti austriak i hoqi të gjitha shpenzimet për riatdhesimin e eshtrave të këtij kolosi të madh!
Imzot Nikollë Kaçorri u rivarros në Kishën e Shën Luçisë në Durrës, ku shërbeu një kohë të gjatë.
Miku im i mirë Pjetër Logoreci, i cili shihet në fotografi gjatë procesionit të zhvarrimit, jeton dhe punon në Vjenë. Është nip i Mati Logorecit, i cili në vitin 1889 hapi shkollën e parë shqipe në Prizren”, ka shkruar Mjeku.
Ndërkaq, Logoreci vazhdon ta quaj fatkeqësi kombëtare e faqe të zezë që ndere nuk i dhanë as deputetët e Durrësit, qytet ky ku sot gjendet varri i tij. /Telegrafi/
