Nënkryetari i Interit, Javier Zanetti pranoi se sezoni 2021/22 do të jetë “i vështirë dhe i komplikuar” për Nerazzurrët.
Antonio Conte u largua nga klubi pasi mori titullin e parë të Interit në Serie A në 11 vjet, por Zanetti beson se skuadra do të jetë ende konkurruese edhe nën urdhrat e trajnerit të ri Simone Inzaghi.
Ish-trajneri i Lazios përgatitet për një kapitull të ri në Inter, të cilët kanë zëvendësuar Romelu Lukaku dhe Achraf Hakimi me Edin Dzeko dhe Denzel Dumfries këtë verë.
Klubi ka qenë në vështirësi financiare kohëve të fundit dhe aktualisht po punon për të rinovuar me Lautaro Martinez dhe shpreson të konkurrojë në krye të tabelës edhe në sezonin 2021-22, por Zanetti paralajmëroi se do të jetë një sezon i vështirë dhe i komplikuar.
“Unë nuk mund t’i gënjej tifozët e Interit, ndoshta të tjerët e bëjnë, por unë nuk mundem”, ka thënë fillimisht Zanetti për Sky Sport Italia.
“Ky do të jetë një sezon i vështirë dhe i komplikuar”.
“Kjo duhet thënë se është e drejtë për të gjithë, por gjithashtu duhet thënë se ne do të jemi konkurrues. Inzaghi po punon mirë”, përfundoi argjentinasi. /Telegrafi/