Nënkryetari i Partisë Socialdemokrate (PSD), Visar Ymeri, ka thënë se miratimi i një platforme shtetërore për dialog në Kuvendin e Kosovës do të duhej të bëhej me 2/3 e votave.
Ymeri, në emisionin “Dossier D” në RTV Dukagjini, ka thënë se bojkotimi i seancës se Kuvendit të Kosovës nga koalicioni qeverisës është paradoks i llojit të vet.
“Mosfunksionimi i Kuvendit të Kosovës më së shumti dëmton qeverinë”, tha ai, përcjell Telegrafi.
Ymeri ka thënë se e kanë ftuar faktorin opozitar, sidomos LDK-në, si grup më i madh parlamentar në Kuvendin e Kosovës, por, sipas tij, Vetëvendosje ka ndërhyrë duke ftuar LDK-në në protesta dhe duke penguar në njëfarë forme bashkëpunimin opozitar.
“Ftesat e Vetëvendosjes janë partiake dhe ne nuk i dimë qëllimet e këtyre organizimeve, pasi nuk jemi të informuar”.
Ai ka thënë se e kanë të pamundur bashkëpunimin opozitar, sidomos me Vetëvendosjen në kushtet aktuale.
“Bashkëpunimi opozitar nuk bëhet në kushte të nënçmimit të tjetrit. Kjo nuk ka kurrfarë kuptimi”.
Ymeri ka thënë se pamundësimi i bashkëpunimit opozitar nuk është i paqëllimshëm nga Vetëvendosje.
“Tendenca e Vetëvendosjes është për të na nënçmuar. Dhe në kushte të tilla pamundësohet bashkëpunimi”, deklaroi Ymeri./Telegrafi/
