Yacine Adli refuzoi të gjitha ofertat që erdhën në drejtim të tij dhe këmbënguli që të qëndroj tek Milan këtë verë, pasi dëshironte qe ti ipej rasti nën urdhërat e Stefano Piolit, diçka që me gjasë do të realizohet duke marrë parasysh lëndimin e Rade Krunic.
Rossonerët nënshkruan me 23-vjeçarin nga ekipi i Bordeaux në verën e vitit 2021 për shumën e 8.5 milionë eurove, por e huazuan atë menjëherë para se ta mirëprisnin në “San Siro” edicionin e kaluar.
Në sezonin e tij të parë me Milanin, Adli pati vështirësi që të gjente hapësirë në formacion, duke luajtur vetëm 140 minuta ose përndryshe vetëm gjashtë ndeshje, në të cilat vetëm njërën e nisi nga minuta e parë.
Në afatin kalimtar veror, mesfushori francez u lidh me një numër të madh klubesh duke përfshirë Salernitanan, Empolin dhe Sassuolon, por, ai i refuzoi të gjitha vetëm për faktin se dëshironte që ta dëshmonte veten tek Milan.
Siç raportohet nga mediat në Itali, Adli pritet të mbush boshllëkun që ka lënë lëndimi i Krunic, dhe ai pritet që të luajë në ndeshjen e radhës ndaj Cagliarit, ndeshje kjo e cila do të jetë e para për ta pas disa muajve si rezervist.
Pioli këtë ide e bëri të ditur në një konferencë për shtyp.
“Krunic ka një problem muskulor. Është e vështirë që ai të rikthehet në ndeshjet e ardhshme, por ne kemi alternative tjera, këtu është Adli të cilin e kam provuar në atë pozitë dhe ne mund të ndryshojmë diçka në fazën e sulmit”, ka thënë Pioli.
Ndeshja mes Cagliarit dhe Milanit do të zhvillohet ditën e mërkurë, me fillim nga ora 18:30./Telegrafi/