Një nxënëse 16 vjeçare është rrahur brutalisht të enjten para shkollës së mesme “12 Maji” në Ratkoc të Rahovecit nga xhaxhai i saj.
E mitura është nxënëse në këtë shkollë, ndërsa xhirimet e rastit të bëra nga një qytetar tregojnë se gjatë rrahjes, bashkë me xhaxhin e saj, kanë qenë të pranishëm edhe dy persona të tjerë. Pas rrahjes, të tre personat shihen duke e futur vajzën dhunshëm në makinën e parkuar afër vendit të ngjarjes nën britmat e saj.
Zyrtarë të stacionit policor në Rahovec kanë konfirmuar për KALLXO.com këtë incident.
Sipas zyrtarit policor në Rahovec, Osman Ismaili, një person me inicialet H.B. është marrë në pyetje në cilësinë e agresorit për këtë rast dhe ndaj tij është shqiptuar masa e ndalimit policor 48 orësh.
Ismaili ka thënë se edhe viktima është marrë në pyetje nga hetuesit policorë.
I dyshuari, në këtë rast xhaxhai i viktimës, Osman Ismailit, jeton jashtë Kosovës dhe ka ardhur përkohësisht në vendlindje.
“Axha i saj punon në shtetet e jashtme, por ngjarja ka ndodhur në oborr të shkollës. Do të hapet rasti për dëmtime të lehta trupore dhe dhunë në familje pasi që konsiderohet se është anëtar i ngushtë i familjes së viktimës”, tha Ismaili.
Video: Bota Press