Kryetari i Kuvendit të Maqedonisë së Veriut, Talat Xhaferi, ka folur për rastin e fundit të cilin e hapi Prokuroria Themelore, në të cilin është raportuar se është përfshirë edhe prokurorja speciale Katica Janeva, e që ka të bëjë me marrje haraç nga disa biznesmenë, për të lehtësuar procedurat penale ndaj tyre.
Xhaferi thotë se janë institucionet përkatëse ato që duhet të thonë fjalën e fundit rreth përfshirjes së dyshuar të kryeprokurores Katica Janeva, e cila tashmë ka dhënë dorëheqjen.
Në një interviste për “Zërin e Amerikës”, Xhaferi tha se në rast se vërtetohet përfshirja, efekti do të ishte domino pasi do të krijonte problem për të gjitha çështjet që ka trajtuar kryeprokurorja speciale.
Xhaferi ndodhet në Washington për të marrë pjesë në punimet e një forumi parlamentar në kuadër të atij që njihet si Partneriteti Demokratik i Dhomës së Përfaqësuesve.
Ky i fundit është një komision dypalësh, i përbërë nga 20 ligjvënës të angazhuar për të punuar drejtpërdrejt me vendet partnere anembanë botës, për të mbështetur zhvillimin e institucioneve legjislative efektive, të pavarura e të përgjegjshme./Telegrafi/
