Në Gllogjan është mbajtur manifestimi qendror i Epopesë së Dukagjinit.
Kryeministri i Maqedonisë së Veriut, Talat Xhaferi, në fjalimin e tij tha se gjendet në Gllogjan për të kujtuar dëshmorët që kanë rënë për lirinë e Kosovës, transmeton Telegrafi.
“Kur shënohet 26 vjetori i epopesë së UÇK-së në Gllogjan, që ishte përgjigja heroike e atdhedashësve në fillimin e luftës në Dukagjin, jam më së i sigurt se ky është vendi se ku duhet të gjendem sot unë. Këtu në Gllogjan bashkë me të gjithë ju për të shprehur nderimet dhe përuljet tonë të pafund si komb, ndaj çdo pikë gjaku që e ka rënë në këtë truall”, ka deklaruar ai.
Tutje, Xhaferi tha se “të ndërtosh një shtet nuk është lehtë, akoma më vështirë është të ndërtosh shtetin kur duhet të luftohesh e të sakrifikosh më të çmuarën”.
Në fjalimin e tij, ai përmendi edhe bombardimet e NATO-s, mbi caqet serbe, ku tha ndihma e miqve është gjithmonë e nevojshme, dhe se e tillë ishte edhe përkrahja luftarake nga NATO.
“Ishte lufta e drejtë për liri dhe vullneti i palëkundur i shqiptarëve që nuk hezituan deri në sigurimin e lirisë për kombin. Lufta në Kosovë dëshmoi se NATO është forca e vetme garantuese e paqes dhe sigurisë në rajon, dhe këtë rol vazhdon ta ketë edhe sot”, tha mes tjerash kryeministri Xhaferi./Telegrafi/