Elon Musk i ka thënë stafit të Twitter se vlera e kompanisë së mediave sociale ka rënë në 19 miliardë dollarë, duke shënuar një ulje të konsiderueshme nga 44 miliardë dollarë që ai pagoi për biznesin vitin e kaluar.
Shifra e re doli në një memorandum të brendshëm që parashtronte planet për t’i dhënë punonjësve kapitalin e vet në biznes me 45 dollarë për aksion, siç u raportua fillimisht nga Fortune.
Kjo shifër është dukshëm më e ulët se marrëveshja prej 54,20 dollarësh për aksion për të cilën Musk ra dakord në tetor të vitit 2022 dhe vjen pas 12 muajsh të trazuar për Twitter, i cili që atëherë është riemërtuar si X, shkruajnë mediat e huaja, përcjell Telegrafi.
Që kur bleu platformën, Musk ka qenë në një “luftë” për të rritur të ardhurat pas një rënie të madhe në shitjet e reklamave.
Që nga blerja e saj, Musk ka shkurtuar mijëra vende pune në një përpjekje për të ulur kostot, duke futur gjithashtu tarifa të reja.
Përpjekja e tij ka përkuar me konkurrencën e re nga aplikacioni rival i Mark Zuckerberg, Threads, i cili gjithashtu i lejon përdoruesit të bëjnë postime të shkurtra, të bazuara në tekst.
Twitter muajin e kaluar u hetua nga BE për shpërndarjen e përmbajtjes së dhunshme dhe dezinformatave në lidhje me luftën Izrael-Hamas.
Platforma u emërua së bashku me TikTok dhe Meta të zotëruar nga Facebook për dështimin për të trajtuar përhapjen e dezinformatave dhe materialeve të tjera të dëmshme. /Telegrafi/