Russell Westbrook dhe Kevin Durant bënë një paraqitje spektakolare të mërkurën mbrëma – por si kundërshtarë.
Dueli i dytë mes dy ish shokëve të skuadrës te Oklahoma City Thunder kaloi sërish me tensione, por edhe me aksione spektakolare, shkruan Telegrafi.
Westbrook ishte dominant gjatë gjithë takimit, kurse më ndryshe nuk ishte as Kevin Durant që ishte edhe më i motivuar ndaj ish skuadrës dhe ish bashklojtarëve që e konsiderojnë tradhtar për kalimin te Golden State.
Në ndeshjen e mbrëmshme që e fitoi Golden State me rezultat 120 – 101, Westbrook ishte spektakolar duke bërë ngulitje të shumta në triple doublen e tij të 21-të këtë sezon të përbërë nga 27 pikë, 15 kërcime dhe 13 asistime.
Durant nga ana tjetër realizoi 40 pikë dhe 12 kërcime, një double-double po ashtu fantastik.
Në një moment gjatë duelit, Westbrook shihet teksa e ngulitë në mënyrë spektakolare në fytyrë të Kevin Durant, i cili tentoi të ndalë Westbrookun – teksa ky i fundit pas ngulitjes e shikoi me injorancë ish shokun e tij të skuadrës që e tradhëtoi.
Pak momente më vonë, Durant u kundërpërgjigj me një treshe të bukur ku ishte i hapur tërësisht pa u mbajtur nga askush.
Rivaliteti i dyshes do të bartet më 11 shkurt në Chesapeake Energy Arena, kur Oklahoma e “mirëpret” “tradhtarin” Kevin Durant dhe ekipin e tij Golden State Warriors. /Telegrafi/
