Ish-manjati i filmave të Hollywoodit, Harvey Weinstein, është dënuar në Los Angeles me 16 vite të tjera burg për akuzat për përdhunim dhe sulm seksual në vitin 2013 të një modeleje dhe aktoreje italiane.
70-vjeçari tashmë po vuan dënimin me 23 vjet për aktakuzën e dytë, të ngritur në New York – shkruan BBC.
Më shumë se 80 persona deri më tani e kanë akuzuar Weinsteinin për përdhunim ose sjellje të pahijshme, por ai ka mohuar se ka pasur ndonjëherë seks pa pajtim të dyanshëm.
Prokurorët kishin kërkuar që producenti të merrte dënim maksimal, pa lirim me kusht, pasi një juri e shpalli atë fajtor në muajin dhjetor.
Për kujtesë, juria e shpalli Weinsteinin fajtor për përdhunim dhe penetrim seksual me objekt të huaj, në të cilin ishte përfshirë një femër. Megjithatë, ai u lirua nga akuzat lidhur me viktimën e dytë të supozuar, teksa nuk pati vendim për dy akuza të tjera.
Filmbërësi ka deklaruar se të gjitha marrëdhëniet e tij seksuale ishin konsensuale dhe se ai nuk ishte fajtor. Avokatët e tij pretendojnë se gratë me dëshirë kishin bërë seks me të, sepse besonin se ai do t’ia avanconte në karrierë.
Ai tashmë i ka kryer dy vite nga dënimi prej 23 vitesh burg, pasi ishte dënuar për sulm seksual në New York. /Telegrafi/
