Lëvizja Vetëvendosje mbajti tubimin e dytë gjatë ditës së tretë të fushatës në Vushtrri.
Tubimi u hap nga kandidatja për deputete, e cila muaj më parë la Norvegjinë dhe u angazhua si Drejtoreshë e Shëndetësisë pranë Komunës së Mitrovicës, Vlora Haxhimehmedi.
Në fjalën e saj, ajo tha se nuk është i vetmi person që e la Perëndimin për t’u kthyer në Kosovë e për të kontribuar në Lëvizjen Vetëvendosje.
« Si unë në Lëvizjen Vetëvendosje janë kthyer plot aktivistë të tjerë, e si unë janë edhe plot kandidatë të tjerë në listën zgjedhore të Lëvizjes VETËVENDOSJE!. Pa harruar ata që kanë qenë këtu gjithnjë e nuk kanë ikur asnjëherë, edhe pse e kanë patur mundësinë. Njerëzit që janë në Lëvizjen VETËVENDOSJE! më bëjnë të ndihem njëmend krenare!», tha para vushtrriasve, Vlora Haxhimehmedi.
Ajo shtoi tutje se Kosova është e zhytur në Vushtrri dhe tha se Vushtrria e njeh dhe e ka parë mirë këtë varfëri, por premtoi se me qeverisjen e Lëvizjes VETËVENDOSJE!, Vushtrria dhe mbarë Kosova do fillojë të dalë nga kjo gjendje.
Tuje, Haxhimehmedi tha se me qeverisjen e VETËVENDOSJE!-s, të shumtit do kenë atë që i takon: punë, mbrojtje në punë, shërbime dinjitoze shëndetësore, çerdhe dhe shtesa për fëmijët, ndihma për bujqësi, mbrojtje të prodhimit vendas.
“Dhe kjo ditë nuk është larg. Ajo është 11 qershori, numri është 35, kryeminstri është Albin Kurti, fitues do të dalim të gjithë bashkë,Prandaj, nga këtu, në Vushtrri, i bëj thirrje të gjithë bashkatdhetarëve tanë që jetojnë në mërgatë, i bëj thirrje të bëjnë çmos të behemi bashkë me njerëzit e mirë të VETËVENDOSJE!s, me njerëzit e mirë të Vushtrrisë, me gjithë qytetarët për t’i sjellë Kosovës fitoren’’, përfundoi fjalën e saj, kandidatja për deputete, Vlora Haxhimehmedi.
Në tubimin elektoral të Lëvizjes VETËVENDOSJE! në Vushtrri, para të pranishmve ka folur edhe Nënkryetarja e Kuvendit dhe kandidatja për deputete nga kjo komunë, Aida Dërguti.
Ajo në fillim të fjalës së saj i uroi mirëseardhje Albin Kurtit, të cilin e quajti kryeministër të ardhshëm i Kosovës, dhe deklaroi se Vushtrria është përcaktuar për ndryshimin.
“Heronjtë e këtij vendi janë të gjithë ata që vendosën të qëndrojnë nën regjimin e Millosheviqit, të gjithë ata që u detyruan ta lëshojnë Kosovën nga presioni i këtij regjimi, por nuk e harruan vendin e tyre: u organizuan dhe mbajtën gjallë me bukë popullin e Kosovës dhe shkollat shqipe, finansuan dhe morën pjesë në luftën çlirimtare. Heronj ishin ata që me gjakun e tyre vulosën lirinë e Kosovës. Heronj ishin edhe ata që u kthyen pasluftës në tokën e djegur e qiellin e hapur, duke i dëshmuar botës sesi duhet mëmëdheu. Heronj janë ata që jetojnë në varfëri e skamje në Kosovën e pasluftës, me shpresën se do të vijnë ditë më të mira”, tha para vushtrriasve Dërguti.
Ish-deputetja Dërguti tha po ashtu se Kosova sot ka nevojë për heronj që përcaktojnë të ardhmen, e shtoi se këta janë heronj që e duan ndryshimin, besojnë në ndryshimin dhe angazhohen që ta bëjnë ndryshimin.
“Ndryshimi mban datën 11 qershor. Ndryshimi ka adresën: Lëvizja VETËVENDOSJE! numër 35. Ka edhe emrin që i prin: Albin Kurti kryeministër”, ishte porosia e Aida Dërgutit për qytetarët e Vushtrrisë dhe të gjithë Kosovës.
Në tubimin e VETËVENDOSJE!-s në Vushtrri, para qytetarëve ka folur ish-deputeti dhe kandidati për deputet, Rexhep Selimi.
“Ka shumë vite që VETËVENDOSJE! i ka prirë ndryshimit të ecjes së shtetit të Kosovës. Ka shumë vite që LVV e ka mbjellur farën e Kosovës, me 11 qershor do ta korrë këtë fitore”, tha në këtë tubim, Rexhep Selimi.
Tutje, ai tha se këtë fitore e kanë mbjellur protestat, rezistenca në parlament, dhe Astrit Dehari.
“Me 11 qershor Kosova do t’ia lë të kaluarën të kaluarës, jetën dhe kohën e vështirë. Kosova më nuk do t’i mbështesë ata që Kosovën e lanë pa sovranitet, pa integritet, dhe me shkelje territoriale. Kosova nuk do t’i mbështesë ata që e lanë atë pa ushtri, ata që vlerën më të lartë të Kosovës UÇK-në e çuan para tribunalit të gjykatës speciale”, tha ndër të tjera Rexhep Selimi.
Ai përfundoi fjalën duke thënë se Kosova e don VETËVENDOSJE!-n, sepse ajo e don dhe e mbron sovranitetin e Kosovës dhe duke ua përmendur sulmet e subjekteve politike të të dy koalicioneve mes vete para se të formonin koalicionet.