Presidenti i Serbisë, Aleksandar Vuçiq, ka komentuar dyshimet lidhur me dy serbë që kishin vizituar Deçanin, disa ditë para se të ndodhte helmimi masiv i qytetarëve.
“Ne kemi një analizë të lëvizjes së automjeteve me targa të Novi Sadit, nuk ishin as 500 metra afër burimit të ujit. Ne po presim të shohim se çfarë do të thonë. Po presim, po dëgjojmë”, tha Vuçiq, transmeton “B 92″, përcjell Telegrafi.
Ndërkaq, portali Albanianpost, ka raportuar se më 27 qershor, Naim Muçaj, pronari i një restoranti, 500 metra në rrugë ajrore larg këtyre pikave të ujit, tha se është vizituar nga dy të rinj serb, të cilët kishin ardhur me një veturë me tabela të Novi Sadit, të cilët e kishin pyetur për Manastirin e Deçanit.
Për shkak se këta dy persona i ishin dukur shumë të dyshimtë, Muçaj kishte njoftuar Policinë e Deçanit dhe u kishte përcjellë pamjet e kamerave të sigurisë, për t’i identifikuar ata.
Mbi 1,500 banorë të Komunës së Deçanit, nga e diela, kanë kërkuar ndihmë mjekësore, duke shfaqur simptoma të helmimit.
Dyshimi i parë për helmimin e tyre, ishte uji i pijsh, por analizat fillestare të Institutit Kombëtar të Shëndetësisë Publike të Kosovës (IKSHPK) nxorën se uji nuk është burimi i helmimit.
Ministri i Shëndetësisë, Arben Vitia ka deklaruar të mërkurën se disa mostra të ujit do të dërgohen jashtë vendit për analiza më të thella. /Telegrafi/