Një ditë para takimit me kryeministrin e Kosovës, Albin Kurti i pari i shtetit serb Aleksandar Vuçiq ka takuar ambasadoren kineze në Beograd, Chen Bo.
Sipas medieve serbe, në këtë takim, Vuçiq kishte kërkuar ndihmën e Kinës rreth Kosovës.
“Ne presim që BE-ja dhe partnerët perëndimorë të ndikojnë në Prishtinë që të përmbushë seriozisht dhe me përgjegjësi obligimet e saj, siç ka bërë Serbia”, ka thënë Vuçiq.
Nuk është hera e parë që presidenti serb bënë kësi lloj takime, veçanërisht me Rusinë dhe Kinën, sa herë që ndodh ndonjë ngjarje e madhe në raport me Kosovën.
Kujtojmë se një ditë pas rritjes së tensioneve në veri të Kosovës të nxituar nga strukturat paralele të Serbisë, Vuçiq kishte takuar ambasadorin rus Aleksandar Bocan-Kharchenko.
“Presidenti Aleksandar Vuçiq ka pritur ambasadorin e Federatës së Rusisë, Aleksandar Botsan-Kharchenko me të cilën bisedoi për situatën aktuale në rajon, veçanërisht pas tensioneve të shkaktuara”, thuhej në njoftimin e partisë së Vuçiqit në Twitter.
Qeveria e Kosovës kishte paralajmëruar se që nga 1 gushti, do të niste zbatimi i reciprocitetit me Serbinë për targat dhe letërnjoftimet. Mirëpo, një ditë para se ky vendim të hynte në fuqi, serbët lokalë në veri të vendit filluan kundërshtimet e tyre duke vendosur barrikada në rrugët që çojnë në dy pikë kalimet kufitare me Serbinë – Jarinje dhe Bërnjak. /Telegrafi/