Shfletimi i fotografive familjare në album për dikë duhet të jetë një gëzim, por studentja nga Anglia Lauren Nicole-Jones nuk e njeh vetën në gjysmën e imazheve të saj në album.
Në fakt, nëse nuk do të ishte për fustanin e njohur të bardhë që ajo kishte veshur në ditën e dasmës së saj, ajo do ta kishte problem ta njihte vetën si nuse në albumin e saj të dasmës.
Lauren vuan nga një gjendje e njohur si ‘verbëria e fytyrës’ që do të thotë se lufton për t’i njohur njerëzit, shkruan The Mirror, përcjell Telegrafi.
Derisa shumica e njerëzve e pranojnë se ndonjëherë e harrojnë fytyrën e dikujt, çrregullimi i Lauren është aq i rëndë sa që jo gjithmonë e kupton se po shikon reflektimin e saj në pasqyrë; ajo nuk mund t’i njohë miqtë e saj të ngushtë, njerëzit e famshëm, dhe e ka problem ta identifikojë vetën në fotografi.
Nuk ka shërim për ‘sëmundjen’ e saj, por ka mësuar të mbështetet në mënyrat, zakonet dhe mënyrën se si flasin njerëzit para se t’i njohë ata.
“Nuk mundem gjithmonë ta shoh vetën në fotografi, që është ndonjëherë e turpshme. Nëse dikush ma tregon një fotografi dhe aty do të figuronte një person me flokë të errëta dhe ka të bëjë me gjatësinë time unë mendoj, ‘pse po më tregohet kjo foto, duhet të jem unë’”, thotë Lauren 33-vjeçare nga Derbyshire.
“Ka pasur raste që kam parë fotografi dhe kam menduar.. duket një vend i bukur, kur shkova atje? Pastaj e kam kuptuar se ishte plotësisht dikush tjetër”, shtoi ajo. /Telegrafi/