Gjykata Themelore në Prishtinë ia ka vazhduar edhe për dy muaj masën e paraburgimit të dyshuarit për vrasjen në lokalin “Bon Vivant”, Andi Pajazitit, i njohur si “Italiani”.
Lajmin për Telegrafin e ka konfirmuar zëdhënësja e kësaj gjykate, Mirlinda Gashi, e cila ka bërë të ditur se Pajaziti po mbahet në Burgun e Sigurisë së Lartë.
Gashi tutje ka njoftuar se “Italiani” më datë 1 shtator ka qenë në Klinikën e Ortopedisë në QKUK për vizitë specialistike.
“Ju njoftojmë se bazuar në lejen e Gjykatës Themelore Prishtinë – Departamenti për Krime të Rënda si dhe nga rekomandimi mjekësorë, me datë 01.09.2023 i pandehuri A.P ka qenë në Klinikën e Ortopedisë të QKUK-së për vizitë specialistike.
Pas vizitës mjekësore, të njëjtin e kanë kthyer prapë në Institucionin e Burgut të Sigurisë së Lartë. Me datë 04.09.2023, Gjykata Themelore në Prishtinë – Departamenti për Krime të Rënda ka aprovuar kërkesën e Prokurorisë Themelore në Prishtinë, për vazhdimin e masës së paraburgimit kundër të pandehurit A.P, ashtu që masa e paraburgimit i është vazhduar në kohëzgjatje prej 2 (dy)muaj”, ka thënë ajo.
“Italiani” është i dyshuari kryesor për vrasjen e rëndë që ndodhi me 4 gusht në lokalin “Bon Vivant” në Prishtinë, ku si pasojë e të shtënave me armë zjarri vdiq K.R., 39-vjeç dhe u plagosën disa të tjerë.
29-vjeçari edhe më parë ishte i njohur për institucionet e sigurisë dhe drejtësisë në Kosovë.
Dosjet e prokurorisë dhe aktakuzat e ngritura ndaj Pajazitit janë kryesisht për armëmbajtje pa leje, lëndim të lehtë trupor, kanosje, shkaktim i rrezikut të përgjithshëm, përdorim i armës. /Telegrafi/