Hygerta Meta, 19-vjeçarja e cila ekzekutoi me armë zjari të atin Pëllumb Meta, është rikthyer në vendin e krimit e shoqëruar nga oficerët e policisë.
Siç shihet dhe nga pamjet e siguruara nga Euronews Albania, 19-vjeçarja shihet me maskë përpara kasolles që groposi të atin.
Qëllimi i rikthimit në skenën e krimit është gjetja e armës, të cilën 19-vjeçarja pohon se e hodhi në kanalin pranë banesës.
Grupi hetimor po vijon punën me detektorë për të gjetur armën e krimit.
Duke u nisur dhe nga përmasat fizike të vajzës, hetuesit kanë dyshime se ajo nuk mund ta ketë kryer e vetme krimin.
Hetuesit po punojnë për të zbuluar rolin e personave të tjerë që mund të kenë bashkëpunuar, përfshirë nënën dhe 2 vëllezërit e 19-vjeçares.
Në dëshminë e saj në polici 19-vjeçarja ka deklaruar se e ka ekzekutuar të atin pas konflikteve të përditshme pasi donta ta fejonte pa dëshirë.
“Ajo ka thënë se babain e ka vrarë pasi donte ta fejonte me një person që nuk e donte. Vajza ka deklaruar në polici se kishin përditë konflikte dhe zënka për këtë shkak”, bëri me dije Euronews Albania.
50-vjeçari u deklarua i zhdukur nga familjarët 10 ditë më parë, ndërkohë që makina e tij u gjet e braktisur në Parkun Rinia në Durrës. Hetuesit po punojnë për të gjetur personin që ka bërë transportimin e makinës në atë zonë, ku sipas deklarimeve të vajzës ka qenë vetë ajo. /Telegrafi/
