Ky është momenti tronditës kur një vrasës gjakftohtë ekzekuton një viktimë me të shtëna në kokë para pasagjerëve të tmerruar në një stacion treni të mbushur plot në Gjermani.
Sipas mediave të huaja, përcjell Telegrafi, pamjet e kamerave të vëzhgimit tregojnë të dyshuarin, 54 vjeç, duke iu afruar 27-vjeçarit nga prapa në Stacionin Qendror të Frankfurtit, në shtetin gjerman të Hesse, rreth orës 21:00 më 20 gusht.
I dyshuari nxori armën dhe e qëlloi viktimën në kokë, duke e bërë atë të rrëzohej përtokë, ndërsa dhjetëra pasagjerë të tmerruar që panë sulmin brutal vrapuan për të shpëtuar jetën e tyre.
Duke qenë se viktima e tij ishte shtrirë i palëvizur në tokë, vrasësi i tij u afrua edhe më tej dhe qëlloi disa të shtëna shtesë përpara se të përpiqej të largohej nga vendi dhe të hidhte armën mënjanë.
Policia e kapi autorin e armatosur disa metra larg vendit të krimit në një platformë aty pranë dhe e arrestoi pa rezistencë.
Arma e vrasjes, një pistoletë, u zbulua gjatë kontrollit të mëvonshëm të stacionit.
Stacioni u mbyll për të gjithë trafikun e trenave për rreth 25 minuta deri në përfundimin e operacionit policor.
Policia e Frankfurtit të Main tha në një deklaratë: “Ndihma erdhi shumë vonë për 27-vjeçarin, i cili vdiq në vendngjarje. Të dy janë shtetas turq”.
Policia tani po heton nëse dy burrat njiheshin me njëri-tjetrin dhe po punon për të përcaktuar motivin e mundshëm të të shtënave.
Ndërkohë mediat turke raportojnë se shkaku i sulmit ka qenë një grindje e përgjakshme familjare mes familjeve kurde të të dyshuarit 54-vjeçar, i cili drejtonte një qebaptore në Gjermani, dhe viktimës 27-vjeçare.
Viktima thuhet se kishte vrarë një biznesmen, të cilin e fajësoi për vrasjen e vëllait të tij në vitin 2016, në Antalia të Turqisë, në maj të këtij viti, përpara se të ikte në Gjermani.
Xhaxhai i biznesmenit e ndoqi 27-vjeçarin dhe dyshohet se e vrau në stacionin e trenit në shenjë hakmarrjeje, sipas mediave turke.
Zëdhënësi i Prokurorisë Publike të Frankfurtit, Dominik Mies tha: “Hetimi është ende në fazat e tij të hershme, ndaj kërkoj mirëkuptimin tuaj se ne nuk mund të themi ende asgjë për motivin apo marrëdhënien midis të dyshuarit dhe viktimës”. /Telegrafi/