Një propozim interesant është aprovuar në mbledhjen e Këshillit të konfederatës Amerikano Jugore të Futbollit në Santiago.
Kupa e Amerikës 2019, e cila do të zhvillohet në Brazil, do të luhet me 16 skuadra.
Gjashtë nga këto përfaqësuese nuk do të jenë amerikano-jugore, por do të vijnë nga Evropa, Amerika Qendrore dhe nga Azia.
Formula e evenimentit parashikon një turne me 10 përfaqësuese të Amerikës Jugore, të cilat janë Brazili, Argjentina, Uruguai, Paraguai, Kili, Peruja, Bolivia, Kolumbia, Ekuadori dhe Venezuela.
Pjesa e mbetur e skuadrave pjesëmarrëse do të jetë nga kontinentet e tjera.
Sipas gjasave nuk do të mungojnë skuadrat e Amerikës Qendrore, që historikisht kanë marrë pjesë në Kupën e Amerikës.
Por, risia lidhet me ftesat e dërguara për vende si Franca, Spanja, Italia dhe Portugalia.
Gjithashtu, ekziston mundësia që pjesë e turneut të jenë edhe përfaqësuese aziatike.
Zgjerimi i turneut lidhet kryesisht me aspektin financiar, duke hedhur një hap të ngjashëm me Kupën e Botës, që nga 32 skuadra kaloi në një turne me 48 ekipe, transmeton ss.
Përveç formatit dhe përfshirjes së skuadrave jo-latine, një tjetër ndryshim i Kupës së Amerikës është se prej edicionit 2020, që do të luhet në Shtetet e Bashkuara, turneu do të luhet në çdo katër vjet.