Në Kuvendin e Kosovës të enjten është miratuar ligji për kinematografi.
Me 75 vota për, asnjë kundër dhe asnjë abstenim, Kuvendi i Kosovës ka miratuar Ligjin për Kinematografinë. Ministri i Kulturës, Hajrullah Çeku, ka thënë se Projektligji do të fuqizojë filmin në Kosovë dhe hap rrugë për investime të huaja.
Lajmin për këtë e ka bërë të ditur edhe anëtarja e komisionin për kulturë, rini dhe sport, Adriana Matoshi, njëherësh deputete nga radhët e Lëvizjes Vetëvendosje.
Përmes një statusi të publikuar në rrjetin social Facebook, aktorja e shumë projekteve të suksesshme kinematografike, ka përshëndetur kolegët e saj, teksa i ka uruar për votimin e këtij ligji.
“Pas nje procesi shume te gjate e me plot veshtiresi, sot votuam perfundimisht ligjin e ri per kinematografi.
Sot po ndihem e plotesume ne dy menyra.
Si deputete e perfaqesuese e komunitetit ne Kuvend te Kosoves, shume e gezume qe ia arritem te behemi bashke edhe me opoziten per ta votu nje ligj kaq te nevojshem per industrine e kinematografise. Falemnderuese edhe per te gjithe akteret institucional dhe artistet qe kane ndihmu me u shkru ky ligj ashtu qe me iu pergjigj nevojave te industrise.
Si artiste, tejmase e gezume qe kinematografia po e merr vemendjen e meritume. Cilesia e prodhimtarise tone kinematografike, me suksese qe secili vend i enderron, ma ne fund po e merr mbeshtetjen ligjore e shteterore. E di qe dita e sotme ka me qene motiv shtese per krejt artistet, producentet, regjisoret, skenaristet, kostumografet e skenografet, me vazhdu me kriju dhe me enderru edhe ma shume. Urime kolegeve te mi, e na shkoft mbare”, ka shkruar Matoshi. /Telegrafi/
