Mbrojtësi i Përfaqësueses së Kosovës, Mërgim Vojvoda ka folur në konferencën për shtyp para ndeshjes eliminatore ndaj Kombëtares së Çekisë.
Kosova është nikoqire e Çekisë në ndeshjen e vlefshme të Grupit A në kuadër të eliminatoreve për Euro 2020.
Kjo ndeshje do të zhvillohet nesër (e shtunë) nga ora 15:00 në stadiumin Fadil Vokrri dhe djelmoshat e trajnerit Bernard Challandes janë gati.
Vojvoda ka folur në konferencë për shtyp para ndeshjes, ku e ka vlerësuar lart Çekinë, por pret shumë nga Kosova.
“Kemi shumë mungesa në skuadër, por konkurrenca është e shëndoshë. Do të japim maksimumin”, ka thënë fillimisht Vojvoda në konferencën për shtyp.
“Për çdo ndeshje ne do të futemi për tre pikë. Edhe në këtë takim futemi për tre pikë”.
“Nuk kalkulojmë në asnjë takim, sidomos kur luajmë përpara tifozëve tanë në Fadil Vokrri”.
“Çekia është tjetër nivel për dallim nga kundërshtarët që kemi luajtur më parë. Por, ne kemi punuar mjaft mirë dhe kemi marrë masat për këtë ndeshje dhe shpresoj se gjithçka do të shkojë mirë”, përfundoi drenicasi. /Telegrafi/