Agjencia e Vlerësimit Kreditor Fitch Ratings ka dhënë Vlerësimin Kreditor BB për Kosovën, duke shënuar kështu herën e parë që vendi merr këtë lloj vlerësimi si shtet.
Vlerësimi Kreditor është indikator tepër i rëndësishëm që tregon aftësinë e një vendi për të shlyer borxhet, dhe merr parasysh qendrueshmërinë e politikave fiskale, borxhin publik, deficitin, rritjen ekonomike, sektorin bankar, dhe cilësinë e qeverisjes ndër tjera.
Në raportin e publikuar më 19 prill, Fitch Ratings thekson në veçanti kredibilitetin e politikave fiskale, stabilitetin dhe nivelin e ulët të borxhit publik, deficitin e ulët buxhetor, dhe sektorin bankar të qëndrueshëm si arsyet kryesore që kanë mbështetur pozitivisht vlerësimin e tyre kreditor për Kosovën.
Administratorja e Agjencisë Amerikane për Zhvillim Ndërkombëtar (USAID), Samantha Power, tha se kjo do të tërheqë investime të huaja, do të reduktojë kostot e huamarrjes, do të rrisë aksesin në tregjet globale të kapitalit dhe do të ndihmojë në përshpejtimin e rritjes ekonomike.
“Kohët e fundit, Kosova siguroi për herë të parë FitchRatings vlerësimi i kredisë sovrane me mbështetje të USAID. Ky moment historik do të tërheqë investime të huaja, do të reduktojë kostot e huamarrjes, do të rrisë aksesin në tregjet globale të kapitalit dhe do të ndihmojë në përshpejtimin e rritjes ekonomike”, shkroi Power në rrjetin social “X”.
Procesi i Vlerësimit Kreditor është mbështetur nga USAID në kuadër të projektit për “Promovim të Investimeve dhe Qasje në Financa”.
Kjo mbështetje forcon më tej bashkëpunimin që Kosova ka me USAID dhe SHBA-në, thuhet në komunikatën për media të Ministrisë së Financave./Telegrafi/
Recently, Kosovo secured its first-ever @FitchRatings sovereign credit rating with @USAID support. This milestone will attract foreign investment, reduce borrowing costs, increase access to global capital markets, and help accelerate economic growth.https://t.co/3GM0RZcCLs pic.twitter.com/5n8rm4lQMS
— Samantha Power (@PowerUSAID) May 4, 2024