Përzgjedhësi i Përfaqësueses së Kosovës, Albert Bunjaku, është duke përgatitur listën për miqësoren 3 qershorit ndaj Ishujve Faroe.
Takimi që luhet në Frankfurt të Gjermanisë, është i pari i Kosovës pas pranimit në UEFA dhe FIFA.
Bunjaku ka ftuar sulmuesin prizrenas të Giresunsporit të Turqisë, Vedat Muriqi, mirëpo ai nuk do të mund të jetë i gatshëm për ndeshjen.
Muriqi, që në Ligën e Dytë turke ka shënuar 17 gola, pikërisht në ditën e ndeshjes ka caktuar datën e fejesës së tij, dhe kjo është arsyeja kryesore pse ai nuk do të mund të jetë i pranishëm.
Ish-sulmuesi i Lirisë ka caktuar muaj më parë datën, për t’i dhënë fund beqarisë.
“Më ka ardhur ftesa, kam biseduar edhe me trajnerin (Albert Bunjaku) dhe u sqarova dhe kërkova ndjesë që nuk mund të jem shkaku që më 3 qershor do të fejohem. Fatëmirësisht trajneri nuk keqkuptoi. I thashë që për herën tjetër, edhe nëse nuk më fton, unë do të vije vetë, pa marrë parasysh se ku do të jeni”, deklaroi Muriqi për “GazetaOlle.com”.
Ai pritet që në verë të transferohet në ndonjë skuadër të elitës së futbollit turk. Në dimër e kërkuan Galatasaray dhe Konyaspori.
Muriqi ka qenë pjesë e Kombëtares U-21 të Shqipërisë.