Investitori bankar britanik dhe anëtari i dinastisë së njohur bankare Rothschild, lordi Jacob Rothschild (78), ka paralajmëruar se situata aktuale gjeopolitike është më e rënda që nga Lufta e Dytë Botërore.
Në raportin vjetor të fondit të investimeve “RIT Capital Partners”, i së cilës është edhe president, ai ka paralajmëruar investitorët rreth kaosit dhe ekstremizmit në Lindjen e Afërt si dhe agresionit të Rusisë dhe zgjerimit të tij, transmeton Telegrafi.
Ai veçanërisht ka vënë në pah dobësimin e Evropës e cila kërcënohet nga një papunësi e lartë, nga fakti se në shumë vende, anëtare të BE-së, askush nuk ka guxuar të zbatojë reformat strukturore.
Gjendja e ekonomisë globale, të cilën ai e ka paraqitur në raportin e fundit vjetor, është shumë më e keqe se e vitit të kaluar, ku si kërcënim më i madh për ekonominë botërore vërehet një ngadalësim në ekonominë kineze dhe mundësia e mbivlerësimit të aksioneve. /Telegrafi/