Ministri i Shëndetësisë, Arben Vitia ka thënë se mungesa e investimeve prej dy dekada ka pasur koston e vet gjatë pandemisë.
Vitia gjatë raportimit të tij në Komisionin për Shëndetësi, u shpreh se edhe vendet shumë më të zhvilluara janë përballur me gjendje të rëndë nga variantet e coronavirusit.
“Ishim dëshmitarë edhe gjatë kësaj kohe se edhe vendet më të zhvilluara dhe me aspekt shëndetësorë shumë të fuqishme se Kosova kishin dhe vazhdojnë që të kenë probleme lidhur me këtë situatë”, tha ai.
Tutje, Vitia shtoi se mungesa e investimeve ka pasur koston e vet.
“Republika e Kosovës nga fillimi u përballë me shumë probleme edhe me ato nga më baziket, si mungesa elementare e pajisjeve dhe barnave dhe kjo na dëshmoi se investimet e munguara për dy dekada në shëndetësi patën koston e vet në një mënyrë aspak të lehtë dhe të dhimbshme për qytetarët tanë”, theksoi ai.
Ministri i Shëndetësisë u shpreh se shpreson që do të ketë konsensus të subjekteve politike që gjendja në shëndetësi të ndryshoj.
“Shpresoj shumë tani e tutje do të ketë konsensus të të gjitha subjekteve politike që në thirrje të qytetarëve kjo gjë do të ndryshohet”, tha Vitia. /Telegrafi/
