Gjiganti gjerman i automobilave do të ketë një kamionçinë në shitje në Amerikën e Veriut, por do t’ju duhet të prisni deri në vitin 2026.
Scout Motors një kompani e sapothemeluar, tërësisht në pronësi të VW, ka ringjallur emërtimin e vjetëruar prej kohësh.
Scout Motors po planifikon lansimin e një SUV-je dhe kamionçine elektrike, të cilat të dyja janë shfaqur shkurtrazi më parë në skicat e hershme të dizajnit që tregojnë profilet e tyre anësore me dizajn retro, raporton motor1, përcjell Telegrafi.
Pamja paraprake zyrtare ofron një pamje të errët në pjesën e përparme në formë kutije, duke lënë të kuptohet për një “stil muskuloz për dyshen aventureske”.
Grupi VW tha më parë se prototipet do të zbulohen në vitin 2023 me stil të frymëzuar nga makina ikonë e viteve 1960.
Nga ajo që ne jemi në gjendje të shohim deri më tani, prototipi lëviz me goma off-road dhe ka një distancë të madhe nga toka.
Kamionçina dhe SUV do të ndajnë një platformë të dedikuar të zhvilluar posaçërisht për veturat elektrike dhe nuk do të kenë asgjë të përbashkët me prodhimin aktual të veturave Volkswagen me emetim zero.
Me fjalë të tjera, nuk do të ketë lidhje me produktet e bazuara në platformën MEB.
E themeluar në maj 2022, kompania Scout Motors drejtohet nga drejtori ekzekutiv Scott Keogh dhe do të ndërtojë makina elektrike në Shtetet e Bashkuara, me synimin për të shitur 250,000 njësi në vit.
Faqja e internetit që përmendëm më parë përfshin një forum si dhe një seksion të dedikuar për listat e vendeve të punës. /Telegrafi/